9 جولائی سے کام شروع ہو چکا ، 500 مریضوں کے علاج کی سہولت موجود ہے، غزہ میں چھ مز ید ہسپتالوں کی معاونت بھی کی جا رہی ہے
ریڈ کریسنٹ قاہرہ و ریڈ کریسنٹ غزہ کی معاونت اور ہمارے ڈونرز کے ہم پر اعتماد کی وجہ سے منصوبہ مکمل ہوا۔ چیئرمین عبدالرزاق ساجد
وجاہت علی خان
“المصطفیٰ ویلفئیر ٹرسٹ” نے جنوبی غزہ کے علاقہ خان یونس میں فیلڈ ہسپتال قائم کر دیا ہے، غزہ جہاں گزشتہ تقریبا دس مہینے سے جنگ جاری ہے جس میں آج تک 40 ہزار لوگ مارے جا چکے ہیں ان میں 15 ہزار سے زیادہ بچے بھی شامل ہیں، “المصطفیٰ ویلفئیر ٹرسٹ” یوں تو کئی سال سے غزہ کے لوگوں کی مدد صحت اور غذائی ضروریات کے ضمن میں کر رہا ہے لیکن حالیہ جنگ کی شروعات سے ان امدادی کاموں میں تیزی لائی گئی ہے، غزہ جہاں ہر قسم کا انفراسٹرکچر اور ہسپتال تک تباہ ہوچکے ہیں وہاں “المصطفیٰ” کی جانب سے “خان یونس فیلڈ ہسپتال” 9 جولائی 2024 سے مکمل طور پر کام کر رہا ہے ہسپتال میں ہر قسم کے طبی آلات مہیا کئے گئے ہیں جہاں روزانہ 500 مریضوں تک کے علاج کی سہولت موجود ہے ان سہولیات میں آپریشن تھیٹر ، انتہائی نگہداشت کے یونٹ (ICU’s) انکیوبیٹرز اور زچگی کی دیکھ بھال بھی شامل ہے “المصطفیٰ” نے ہسپتال کا یہ منصوبہ “ریڈ کریسنٹ قاہرہ “ اور ریڈ کریسنٹ غزہ کے باہمی تعاون سے مکمل کیا ہے، اس کے علاوہ “المصطفیٰ” کے تعاون سے غزہ کے مختلف علاقوں میں موجود 6 مزید ہسپتالوں کی معاونت بھی کی جا رہی ہے جن میں جنوبی غزہ کا “فیلڈ ہسپتال تل الحوا” فیلڈ ہسپتال خان یونس” ریڈ کریسنٹ فیلڈ ہسپتال خان یونس” فیلڈ ہسپتال نابلس” “ اُردنی سرجیکل سٹیشن رام اللہ” اور “اُردنی سرجیکل سٹیشن جینین شامل ہیں ، “المصطفیٰ ویلفئیر ٹرسٹ” کے لندن آفس میں ایک پریس کانفرنس سے خطاب کرتے ہوئے “المصطفیٰ” کے چیئرمین عبدالرزاق ساجد نے کہا کہ حالیہ جنگ کے بعد ہم لاکھوں پاؤنڈ مالیت کی امداد غزہ بھجوا چکے ہیں جس میں پینے کا صاف پانی، گرم کپڑے ، گدے، کمبل، خیمے، حفظان صحت کی کٹس بھی شامل ہیں اُنہوں نے کہا انسانی خدمات کے ان تمام کاموں میں ہمیں اپنے ڈونرز کا مالی تعاون اور اعتماد حاصل رہا ہے اس تعاون کے ساتھ ساتھ ہمیں لندن اور غزہ میں اپنی ٹیم اور “ریڈ کریسنٹ قاہرہ اور غزہ ریڈ کریسنٹ کا تعاون بھی حاصل ہے جس وجہ سے ہم اس قابل ہوئے کہ ابھی تک ہم صرف غذائی ضروریات کی مد میں 285000 افراد کو فوڈ پیک اور طبی امداد کی مد میں 47000 افراد کو ضروری طبی سامان مہیا کر چکے ہیں ، انہوں نے کہا میں خود اپنی ٹیم کے ہمراہ کئی دفعہ قاہرہ اور غزہ بارڈر تک امدادی ٹرکوں کے زریعہ امداد پہنچا چکے ہیں اس موقع پر “المصطفیٰ” کی ڈائرکٹر صدف جاوید نے کہا کہ ہم انہی اداروں کے ساتھ مل کر کام کر رہے ہیں جن کے پاس غزہ کے اندر جا کر کام کر نے کا پرمٹ موجود ہے، تقریب میں “المصطفیٰ ویلفئیر ٹرسٹ” کے غزہ کے لئے کئے گئے امدادی کاموں پر مشتمل ایک ڈاکومینٹری بھی دکھائی گئی، اس موقع پر “المصطفیٰ” کے پرجیکٹ ڈائریکٹر نثار احمد نے کہا ہم فلسطین کے لئے کام کرنے والی اقوام متحدہ کی ایجنسی “انروا” اور دیگر اداروں کے ساتھ مل کر کام کر رہے ہیں ،سابق مئیر ہونسلو افضال کیانی نے کہا کہ یہ بات خوش آئند ہے کہ “ المصطفیٰ “ کے توسط سے تمام معلومات ہم سب تک پہنچ رہی ہے ، بیرسٹر زبیر اعوان ، ہونسلو مسجد کے سابق چیئرمین چودھری عبدالمجید، سینئر صحافی طاہر چودھری اور الفورڈ اسلامک سینٹر کے ترجمان احمد نواز نے بھی خطاب کیا اس موقع پر صحافیوں کی ایک بڑی تعداد نے بھی شرکت کی۔
