’’ المصطفیٰ ‘‘کے زیراہتمام بہاؤالدین زکریا یونیورسٹی ملتان میں گلوبل وارمنگ کے موضوع پر خصوصی سیمینار
یونیورسٹی آف ویٹرنری سائنسز اور لیڈز یونیورسٹی لاہور میں ” ون ٹری ون سٹوڈنٹ ” کے عنوان سے شجرکاری مہم
المصطفیٰ ویلفیئر ٹرسٹ نے پھیلتی ہوئی فضائی آلودگی اور زمین کے مسلسل بڑھتے ہوئے درجہ حرارت کے پیش نظر ، دنیا کو گرین اور کلین بنانے کے لئے Make the word greener کے نام سے خصوصی مہم مختلف ممالک میں شروع کر رکھی ہے ۔ اس مہم کے سلسلہ میں پاکستان کے مختلف علاقوں میں بھی شجرکاری کی جا رہی ہے ۔ پودے لگائے جا رہے ہیں اور باغات اگائے جا رہے ہیں ۔ اسی سلسلہ میں المصطفیٰ ویلفیئر ٹرسٹ کے زیراہتمام پاکستان کے تعلیمی اداروں میں ” ون ٹری ون سٹوڈنٹ ” کے عنوان سے کیمپین جاری ہے ۔ ملک بھر میں جاری اس کیمپین کے تحت گذشتہ دنوں بہاؤالدین زکریا یونیورسٹی ملتان ، یونیورسٹی آف ویٹرنری سائنسز لاہور اور لیڈز یونیورسٹی لاہور میں ہزاروں پودے لگائے گئے ۔ پودے لگانے کے اس عمل میں یونیورسٹیوں کے اساتذہ اور طلباء و طالبات جوش و خروش سے شریک ہوئے ۔۔ اسی سلسلہ میں ’’ المصطفیٰ ‘‘کے زیراہتمام بہاؤالدین زکریا یونیورسٹی ملتان کے سوشالوجی ڈیپارٹمنٹ میں گلوبل وارمنگ کے موضوع پر سیمینار بھی منعقد کیا گیا ۔ جس سے یونیورسٹی کے ڈین آف ایگریکلچر ڈیپارٹمنٹ ڈاکٹر حکومت علی خان ، پروفیسر ڈاکٹر کامران اشفاق ، پنجاب بار کونسل کی ایگزیکٹو کمیٹی کے چیئرمین محمد افضل دھرالہ ایڈووکیٹ ، پنجاب بار کونسل کے رکن رانا طفیل نون ایڈووکیٹ ، محمد حسین بابر ایڈووکیٹ اور ’’ المصطفیٰ ‘‘کے کوآرڈینیٹر ارحم سلیم قادری نے خطاب کیا ۔ مقررین نے کہا کہ اقوام متحدہ کی تازہ رپورٹ کے مطابق دنیا میں تیزی سے بڑھنے والے سنگین خطرات میں گلوبل وارمنگ سرفہرست ہے ۔ گلوبل وارمنگ کے حوالے سے پوری دنیا سرخ لکیر کے قریب پہنچ چکی ہے ۔ شدید گرمی کی لہر جو صنعتی دور سے پہلے 50 سال میں ایک بار آتی تھی ، اب ہر دس سال کے بعد آ رہی ہے ۔ سرخ لکیر عبور کرنے کے بعد ہمیں ہر سات سال میں شدید ترین گرمی کا دو بار سامنا کرنا پڑے گا ۔ اس لئے گلوبل وارمنگ کے خطرے کی روک تھام کے لئے دنیا بھر کے تمام ممالک ترجیحی بنیادوں پر مشترکہ کوششیں کریں ۔ ’’ المصطفیٰ ‘‘ کے سیمینار سے خطاب کرتے ہوئے مقررین کا مزید کہنا تھا کہ درجہ حرارت بڑھ جانے سے زمین کے قدرتی نظام میں خلل پڑتا ہے ۔ گلوبل وارمنگ پر توجہ نہ دی گئی تو خشک سالی ، قحط ، جنگلات میں آگ لگنے کے واقعات بڑھ جائیں گے اور سمندری طوفانوں کی تعداد میں اضافہ ہو گا ۔ آکسیجن تمام جانداروں کے لئے ناگزیر ہے ، جنگلات کا صفایا آکسیجن کی کمی کا سبب بن رہا ہے ۔ موسمی تغیرات سے بچنے اور کرہ ارض کے تحفظ کے لئے انفرادی و اجتماعی کردار ادا کرنا ہو گا ۔ مقررین نے ’’ المصطفیٰ ‘‘ کی شجرکاری مہم کا خیرمقدم کیا ۔
